تحدثت الإعلامية رضوى الشربيني عن عودة الفنانة شيرين عبد الوهاب لطليقها الفنان حسام حبيب.

وقالت رضوى الشربيني عبر برنامجها هي وبس عبر شاشة cbc سفرة: “إزاي تقولوا على شيرين عبد الوهاب معندهاش كرامة”، ودافعت عن حسام حبيب متسائلة: “حد يقولي غلط في ايه؟.

وأضافت: “شقيق شيرين هو اللي قال تصريحات مش كويسة في حق شقيقته وكان في حد من مصلحته أن تكون نفسية شيرين مش كويسة”.

وعن عودة شيرين لحسام حبيب، قالت رضوى الشربيني: “أحنا مالنا مترجعلوا لبعض اللي بيشيل قربة مخرومة بتخر على دماغه أحنا أيه مشكلتنا أن شيرين وحسام يسيبوا أو يرجعوا لبعض.. تاريخ حسام حبيب ومداخلاته الهاتفية لم يقول كلمة سيئة في حق شيرين”.

ووجهت رضوى الشربيني رسالة لشيرين: “انتي إنسان غير عادي وعشان كدا حصل الضجة الكبيرة دي وكلامك قدوة لستات كتير وأى واحدة مش قريبة منك هتقول أنك ست بلا كرامة بعد هجومك من قبل بشكل عنيف على حسام حبيب”.

وتابعت في حديثها لشيرين: “أحنا بندعمك بس خلي مشاكل بيتك جوة بيتك وكفاية عك بقى وخلوا الناس تنسى العك دا وانتي قدوة ومشهورة ولما اكلمتي قبل كدا عن العوانس أنا زعلت لأنك قدوة وصوت مصري نفتخر به وليكي جمهور كبير بيحبك وفي ضهرك وبطلب منك بشكل شخصي تاخدي بالك من كلامك”.

 

وكانت النجمة شيرين عبد الوهاب قد أكدت في مداخلة هاتفية مساء أمس “الجمعة” مع الإعلامي عمرو أديب أنها عادت للفنان حسام حبيب وتم عقد القران، وأنها تعد جمهورها بأنها في أمان، ولن تتحدث مرة أخرى فيما يخص أمور بيتها، مشيرة إلى ان الإعلامية نضال الأحمدية أرسلت لها هي وحسام باقة ورد.

عقد قران شيرين عبد الوهاب وحسام حبيب
وقالت شيرين عبد الوهاب: “تم كتب كتابي على حسام جبيب امبارح الساعة 9 بليل بحضور أقرب الناس لينا، أخواتنا وبطمن الناس عليّ وعايزة استغل الفرصة دي واقول اني بعتذر لحسام عن كلام صدر مني في يوم من الأيام”.

وتابعت: كنت السبب أن الحياة دي اتفتحت على الناس والناس دي انشغلت بيا ضمن مشاكلهم، فأنا في عصمة رجل طيب جدا ولو كنت قولت كلام عنه فهو كان مزعلني فدا شيطان بيحصل بين المتزوجين، واحنا كان معمول لنا حاجة كبيرة أوي واتفكت الحمدلله، أنا اصغر من الكلام عن الأعمال لكنها ذكرت في القرآن واحنا مش معصومين من الغلط ،أنا غلطت لما طلعت اتكلمت بصوت عالي، أنا شيرين اللي طلعت واتكلمت والحقيقة كل حاجة كانت في العلن زعلي كان في العلن وحبي كان في العلن وكله كان في العلن.

وعلق حسام حبيب على تصريحات شيرين قائلا: “أحنا حياتنا زي أي اتنين متزوجين، أحنا اتكلمنا قبل الرجوع واتفقنا على قوانين وقواعد، وحطينا مشاكلنا وحليناها ووعدنا بعض أن كل واحد فينا يخلي التاني مبسوط بيه، وحياتنا الخاصة لينا احنا بس”.

يذكر أن شيرين عبد الوهاب غادرت المستشفى الذي كانت تتلقى فيه العلاج الفترة الماضية.

وكان المستشار ياسر قنطوش محامي شيرين عبد الوهاب أصدر بيانا بعد خروجها من المستشفى قال فيه وفقا لما ورد هنا: “الحمد لله خروج الفنانة شيرين عبد الوهاب بالسلامة من المستشفى وهى بصحة جيدة وتشكر جميع جمهورها وكل من ساندها في أزماتها وستتحدث في فيديو خلال ساعات”، وذلك بعدما استغاثت به موكلته في تسجيل صوتي، لإخراجها من المستشفى.

وقالت شيرين في التسجيل إنها أصبحت بصحة جيدة بعد مرور 20 يومًا على تلقيها للعلاج في المستشفى.